06.02.2018ԲՐԻՏԱՆԱԿԱՆ THE TELEGRAPH ՊԱՐԲԵՐԱԿԱՆԸ ԿԱԶՄԵԼ Է ԱՇԽԱՐՀԻ ՏԱՐԲԵՐ ԵՐԿՐՆԵՐՈՒՄ ԿՐՈՆԱՍԻՐՈՒԹՅԱՆ ՄԱԿԱՐԴԱԿԻ ՔԱՐՏԵԶԸ
ԼՈՆԴՈՆ. Բրիտանական հեղինակավոր The Telegraph պարբերականը կազմել է աշխարհի տարբեր երկրներում կրոնասիրության մակարդակի քարտեզը։ Ինչպես ցույց է տալիս քարտեզը, աշխարհում առավել կրոնասեր տարածաշրջաններն են Աֆրիկան և Մերձավոր Արևելքը, նրանցից այնքան էլ հետ չեն մնում Հարավարևելյան Ասիան և Լատինական Ամերիկան, տեղեկացվում է պարբերականի կայքում։
Քարտեզը կազմվել է WIN / Gallup International-ի երեք հարցումների հիման վրա, որոնք անցկացվել են 2008, 2009 և 2015թթ.։ Հարցվածներից յուրաքանչյուրը «այո» կամ «ոչ» է պատասխանել այն հարցին, թե արդյոք իրեն հավատացյալ է համարում։ Այնուհետև արդյունքները մշակել և տեղադրել են քարտեզի վրա։
Երկրներն այնտեղ ներկված են տարբեր գույներով՝ կախված այն բանից, թե բնակչության որ տոկոսն է հավատացյալ։ Դեղին գույնով նշված են կրոնասիրության ցածր մակարդակ ունեցող վայրերը։ Իսկ այնուհետև, այդ ցուցանիշի աճման կարգով, գույնը հասցվել է մուգ կապույտի։
Կրոնասիրության գծով առաջատարը Եթովպիան է, այստեղ 99%-ը հավատացյալներ են, ընդ որում՝ երկրում մեծ թիվ են կազմում ինչպես քրիստոնյաները, այնպես էլ մահմեդականները։ Նույն ցուցանիշն է նաև Մալավիում, Նիգերիայում, Շրի Լանկայում, Եմենում։ Սոմալիում հավատացյալները կազմում են 98%, Աֆղանստանում՝ 97%։
Արևմտյան, Հյուսիսային և Կենտրոնական Եվրոպան հիմնականում աթեիստական է։ Եվրոպայի ամենակրոնասեր երկիրը Լեհաստանն է (86%)։ Հավատը կարևոր է նաև արևելաեվրոպական շատ այլ երկրների համար։ Այսպես, Ռուսաստանում այց ցուցանիշը հավասար է 70%-ի, Ուկրաինայում՝ 73%-ի։ Սակայն Լատվիայում կրոնասեր քաղաքացիները կազմում են բնակչության լոկ 40%-ը, Լիտվայում՝ 42%, Բելառուսում՝ 34%-ը։
Կրոնասիրության բարձր մակարդակ է նկատվում նաև Իտալիայում (74%) և Հունաստանում (71%)։
Մյուս կողմից՝ կրոնասիրության ամենացածր մակարդակ ունեցող երկրների շարքում են՝ Ճապոնիան (13%), էստոնիան (16%), Շվեդիան (19%), Նորվեգիան (21%) և Չեխիան (23%), բայց Չինաստանը գերազանցում է բոլորին (7%)։
Աշխարհի ամենակրոնասեր երկրների թոփ-տասնյակում, The Telegraph-ի վարկածով, մտնում են.
1. Եթովպիա - 99%-ն իրեն համարում է հավատացյալ
2. Մալավի - 99%
3. Նիգերիա - 99%
4. Շրի Լանկա - 99%
5. Եմեն - 99%
6. Բուրունդի - 98%
7. Ջիբութի - 98%
8. Մավրիտանիա - 98%
9. Սոմալի - 98%
10. Աֆղանստան - 97%
Աշխարհի ամենաքիչ կրոնասեր երկրների թվում, ըստ The Telegraph-ի վարկածի, մտնում են.
1. Չինաստան - 7%
2. Ճապոնիա - 13%
3. Էստոնիա - 16%
4. Շվեդիա - 19%
5. Նորվեգիա - 21%
6. Չեխիա - 23%
7. Հոնկոնգ - 26%
8. Նիդեռլանդներ - 26%
9. Իսրայել - 30%
10. Միացյալ Թագավորություն - 30%։
http://www.rodon.org/relig-180131112954
դեպի ետ